‘ഗ്യാനേഷ് കുമാറിനെതിരെ പരാതി, കഴമ്പുണ്ടെന്ന് ബോധ്യപ്പെട്ടു’; വിജിലൻസ് അന്വേഷണത്തിന് നിർദേശിച്ച് രമേശ് ചെന്നിത്തല

തിരുവനന്തപുരം: മുഖ്യതിരഞ്ഞെടുപ്പ് കമ്മീഷണർ ഗ്യാനേഷ് കുമാർ പി.ഡബ്ല്യു.ഡി സെക്രട്ടറിയായിരുന്ന കാലത്ത് നടത്തിയതായി ആരോപിക്കുന്ന അഴിമതിയിൽ പരാതി ലഭിച്ചിരുന്നെന്ന് ആഭ്യന്തരമന്ത്രി രമേശ് ചെന്നിത്തല. പരാതിയിൽ കഴമ്പുണ്ടെന്ന് പ്രഥമദൃഷ്ട്യാ ബോധ്യപ്പെട്ടതോടെയാണ് വിജിലൻസ് അന്വേഷണത്തിന് നിർദേശം നൽകിയതെന്ന് അദ്ദേഹം പറഞ്ഞു. മുഖ്യമന്ത്രിയുമായി ആലോചിച്ച ശേഷമാണ് അന്വേഷണത്തിന് തീരുമാനിച്ചതെന്നും ചെന്നിത്തല വ്യക്തമാക്കി. നിരവധി പരാതികൾ ഉയർന്നിരുന്നെന്നും രണ്ട് ആത്മഹത്യാക്കുറിപ്പുകൾ ഉണ്ടായിരുന്നെന്നും അതിൽ ഒന്നിൽ ഗ്യാനേഷ് കുമാറിന്റെ പേര് വ്യക്തമായി പരാമർശിച്ചിരുന്നെന്നും മന്ത്രി പറഞ്ഞു.

വി.എസ്. അച്യുതാനന്ദൻ മുഖ്യമന്ത്രിയായതിന് ശേഷം കേസിൽ തുടർനടപടികൾ ഉണ്ടായില്ലെന്നും പിന്നീട് ഗ്യാനേഷ് കുമാറിനെ സ്ഥലംമാറ്റുകയായിരുന്നെന്നും ചെന്നിത്തല പറഞ്ഞു. കെഎസ്ടിപി പദ്ധതിയുമായി ബന്ധപ്പെട്ട് നേരത്തെ തന്നെ അഴിമതി ആരോപണങ്ങൾ ഉയർന്നിരുന്നു. എന്നാൽ കെഎസ്ടിപി പദ്ധതി മാത്രമല്ല അന്വേഷണത്തിന്റെ പരിധിയിലുള്ളത്. അഴിമതി ആരോപിച്ച് ഒരു പ്രോജക്ട് എൻജിനീയർ ആത്മഹത്യ ചെയ്ത സംഭവവും അന്വേഷണവിധേയമാക്കുമെന്ന് ആഭ്യന്തരമന്ത്രി വ്യക്തമാക്കി.

അതേസമയം, നിലവിൽ മുഖ്യതിരഞ്ഞെടുപ്പ് കമ്മീഷണർ പദവിയിലിരിക്കുന്ന ഗ്യാനേഷ് കുമാറിനെതിരെ അന്വേഷണം നടത്തുന്നതിന് നിയമപരമായ തടസ്സമുണ്ടോയെന്ന കാര്യത്തിൽ പരിശോധന നടത്തിയിരുന്നു. മറ്റൊരു വകുപ്പിൽ സെക്രട്ടറിയായിരുന്ന കാലത്തെ ആരോപണങ്ങളാണ് അന്വേഷിക്കുന്നതെന്നതിനാൽ അന്വേഷണത്തിന് തടസ്സമില്ലെന്നാണ് നിയമോപദേശം ലഭിച്ചത്. ഇതിന്റെ അടിസ്ഥാനത്തിലാണ് വിജിലൻസ് അന്വേഷണത്തിന് നിർദേശം നൽകിയതെന്നും രമേശ് ചെന്നിത്തല വ്യക്തമാക്കി.