കുവൈറ്റില്‍ വിദേശമദ്യ കച്ചവടവും കള്ളപ്പണം വെളുപ്പിക്കലും: വിദേശി പിടിയില്‍, 172 കുപ്പി മദ്യം പിടിച്ചെടുത്തു
കുവൈറ്റ് സിറ്റി: വിദേശമദ്യ വില്‍പ്പനയും അതിലൂടെ ലഭിച്ച പണം വെളുപ്പിക്കാനും ശ്രമിച്ച കേസില്‍ കുവൈറ്റ് പൗരനല്ലാത്ത വിദേശിയെ ക്രിമിനല്‍ സെക്യൂരിറ്റി വിഭാഗം (അഹ്‌മദി ഇന്‍വെസ്റ്റിഗേഷന്‍ വിഭാഗം) അറസ്റ്റ് ചെയ്തു. കൃത്യമായ രഹസ്യവിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിനൊടുവില്‍, ജാബര്‍ അല്‍-അഹ്‌മദ് ഏരിയയിലെ താമസസ്ഥലത്തുനിന്ന് പുറത്തിറങ്ങുന്നതിനിടെയാണ് പ്രതിയെ സുരക്ഷാസേന പിടികൂടിയത്. ചോദ്യം ചെയ്യലില്‍ വിദേശമദ്യ കച്ചവടം നടത്തുന്നതായി പ്രതി സമ്മതിച്ചു. തുടര്‍ന്ന് ഇയാളുടെ താമസസ്ഥലത്ത് നടത്തിയ പരിശോധനയില്‍ 172 കുപ്പി വിദേശമദ്യവും അനധികൃത വില്‍പ്പനയിലൂടെ ലഭിച്ച 465.750 കുവൈറ്റി ദിനാറും പിടിച്ചെടുത്തു.വിദേശമദ്യം വില്‍ക്കുന്നതിനായി ബാങ്ക് അക്കൗണ്ടുകള്‍ ഉപയോഗിച്ച് ഉപഭോക്താക്കള്‍ക്ക് പേയ്മെന്റ് ലിങ്കുകള്‍ (payment links) അയച്ചുകൊടുക്കുകയും, അതുവഴി ലഭിക്കുന്ന തുക ബാങ്ക് അക്കൗണ്ടുകളില്‍ നിക്ഷേപിച്ച് നിയമാനുസൃതമായ പണമാണെന്ന് വരുത്തിതീര്‍ക്കാന്‍ ശ്രമിച്ചതായും അന്വേഷണത്തില്‍ കണ്ടെത്തി. പ്രതിക്കെതിരെ കള്ളപ്പണം വെളുപ്പിക്കല്‍ കേസും ചുമത്തിയിട്ടുണ്ട്. തുടര്‍ നിയമനടപടികള്‍ക്കായി പ്രതിയെയും പിടിച്ചെടുത്ത തൊണ്ടിമുതലുകളും സംബന്ധിച്ച വകുപ്പുകള്‍ക്ക് കൈമാറി.