രമ്യാഹരിദാസിനെതിരേ നടപടി വന്നേക്കും ; എംഎല്‍എ കെ.സി. വേണുഗോപാലുമായി പാലക്കാട് കൂടിക്കാഴ്ച നടത്തി?
പാലക്കാട്: ചിറയിന്‍കീഴ് എംഎല്‍എ രമ്യാഹരിദാസ് ഉള്‍പ്പെട്ട കോണ്‍ഗ്രസ് പ്രവര്‍ത്തകരുടെ കയ്യാങ്കളിയില്‍ എഐസിസി ജനറല്‍ സെക്രട്ടറിയും മുതിര്‍ന്ന നേതാവുമായ കെ.സി. വേണുഗോപാലുമായി രമ്യ കൂടിക്കാഴ്ച നടത്തിയതായി സംശയം. ഇന്നലെ ഡല്‍ഹിക്ക് പോകുകയാണെന്ന ധാരണ പരത്തിയ ശേഷം രമ്യ പാലക്കാട്ട് എത്തിയെന്നും കെ.സി. വേണുഗോപാലുമായി സംസാരിച്ചെന്നുമാണ് റിപ്പോര്‍ട്ടുകള്‍.
ഇന്നലെ രമ്യ അന്വേഷണക്കമ്മീഷന് മുന്നില്‍ എത്തുമെന്നാണ് കരുതിയിരുന്നെങ്കിലും വൈകിട്ടോടെ രമ്യ പാലക്കാട് ഡിസിസി ഓഫീസില്‍ എത്തിയതായിട്ടാണ് വിവരം. ഇന്നലെ വൈകിട്ട് 7.30 മുതല്‍ രമ്യ പാലക്കാട് ജില്ലയില്‍ ഉണ്ടായിരുന്നു എന്നാണ് വിവരം. കൂടിക്കാഴ്ചയ്ക്ക് ശേഷം കെ.സി. വേണുഗോപാല്‍ പോയ ശേഷമാണ് രമ്യ തിരിച്ചുപോയതെന്നും റിപ്പോര്‍ട്ടുകളില്‍ പറയുന്നു. സംഭവത്തില്‍ രമ്യയ്ക്ക് എതിരേ നടപടിക്ക് സാധ്യത നിലനില്‍ക്കേയാണ് കൂടിക്കാഴ്ച. ചിറയിന്‍കീഴിലെ പ്രശ്‌നം പാര്‍ട്ടിക്ക് വലിയ നാണക്കേട് ഉണ്ടാക്കിയെന്നും രമ്യയ്ക്ക് എതിരേ കര്‍ശന നടപടി വേണമെന്നും കോണ്‍ഗ്രസിനുള്ളില്‍ നിന്നു തന്നെ ആവശ്യം ഉയരുന്നുണ്ട്. നടപടിയെടുക്കാത്തതില്‍ പ്രതിഷേധവുമുണ്ട്.
എംഎല്‍എയുടെ ഭാഗത്ത് നിന്ന് ഉണ്ടാകേണ്ട പ്രവര്‍ത്തിയല്ല രമ്യയില്‍ നിന്നും ഉണ്ടായതെന്നാണ് പാര്‍ട്ടി നേതൃത്വത്തിന്റെ വിലയിരുത്തല്‍. സംഭവത്തില്‍ അന്വേഷണക്കമ്മീഷനെ വെച്ചിരിക്കുകയാണ് കോണ്‍ഗ്രസ്. പാര്‍ട്ടി നിയോഗിച്ച അന്വേഷണ സമിതിയുടെ റിപ്പോര്‍ട്ടിന്മേല്‍ ആയിരിക്കും നടപടിയെടുക്കുക. രമ്യ നേരിട്ട് മൊഴി നല്‍കാന്‍ ഉടന്‍ ഹാജരായേക്കും. കഴിഞ്ഞ ദിവസം ഫോണ്‍ കോള്‍ വഴിയാണ് രമ്യ ഹരിദാസ് വിശദീകരണം നല്‍കിയത്. എന്നാല്‍ നേരിട്ടുള്ള മൊഴി കൂടി രേഖപ്പെടുത്തിയ ശേഷമാകും കൂടുതല്‍ നടപടി ഉണ്ടാകുക.
സംഭവത്തില്‍ സജിത്ത് മുട്ടപ്പലത്തിനെതിരെ നടപടി ഉണ്ടായാല്‍ പ്രതിഷേധം അറിയിക്കാനാണ് യൂത്ത് കോണ്‍ഗ്രസിന്റെ തീരുമാനം. എംഎല്‍എ ആണ് ആദ്യം സുജിത്തിനെ മര്‍ദിച്ചത് എന്ന ദൃശ്യങ്ങള്‍ പുറത്ത് വന്നതിനു പിന്നാലെയാണ് യൂത്ത് കോണ്‍ഗ്രസ് സജിത്തിന് പരസ്യ പിന്തുണ നല്‍കുന്നത്. സജാദ് വിളിച്ചിട്ടാണ് രമ്യ വീട്ടിലേക്ക് എത്തിയതെന്ന രമ്യയുടെ വാദത്തിലും സംശയം നിലനില്‍ക്കുന്നുണ്ട്. സജാദിന്റെ വീട്ടുകാരെ കാണാന്‍ എത്തുന്നു എന്നു പറഞ്ഞ് രമ്യയാണ് വീട്ടിലേക്ക് പോയതെന്നാണ് സംശയം. സംഘര്‍ഷത്തിന് ശേഷം രമ്യാഹരിദാസും, മറ്റ് രണ്ടുപേരും ഓടി ഇറങ്ങുന്നതും ദൃശ്യങ്ങള്‍ പുറത്തുവന്നിരുന്നു. വാഹനം റോഡിലിട്ട ശേഷമാണ് രമ്യാ ഹരിദാസ് ഇടവഴിയിലൂടെ വീട്ടിലേക്ക് കയറിയത്.