കുവൈത്തില്‍ ട്രാഫിക് ലംഘകർ ശ്രദ്ധിക്കുക; പിഴ അടയ്ക്കാൻ വൈകിയാൽ കോടതി കയറും; ജയിൽ ശിക്ഷയെന്ന് മുന്നറിയിപ്പ്
കുവൈത്ത്‌സിറ്റി: ട്രാഫിക് പിഴകള്‍ കൃത്യസമയത്ത് അടച്ചുതീര്‍ക്കണമെന്ന് വാഹന ഉടമകള്‍ക്ക് ആഭ്യന്തര മന്ത്രാലയം മുന്നറിയിപ്പ്. പിഴയടയ്ക്കുന്നതില്‍ വീഴ്ച വരുത്തിയാല്‍ ജയില്‍ ശിക്ഷ വരെ ലഭിച്ചേക്കാമെന്നാണ് മന്ത്രാലയം വ്യക്തമാക്കുന്നു.
ആഭ്യന്തര മന്ത്രാലയം പുറപ്പെടുവിച്ച നിര്‍ദ്ദേശങ്ങള്‍:
ട്രാഫിക് കോടതിയിലേക്ക്: സമയം വൈകിപ്പിക്കുന്ന ട്രാഫിക് ലംഘനങ്ങള്‍ ട്രാഫിക് കോടതിക്ക് കൈമാറാന്‍ അധികാരികള്‍ നിര്‍ബന്ധിതരാകും. കോടതി കൂടുതല്‍ കടുപ്പമേറിയ ശിക്ഷകള്‍ വിധിക്കാന്‍ ഇത് ഇടയാക്കും.
കടുത്ത ശിക്ഷാനടപടികള്‍: ട്രാഫിക് നിയമപ്രകാരം, ലംഘനത്തിന്റെ സ്വഭാവവും ഗുരുതരതയും കണക്കിലെടുത്ത് കോടതികള്‍ക്ക് ഉയര്‍ന്ന തുക പിഴയായി ചുമത്താനോ അല്ലെങ്കില്‍ തടവുശിക്ഷ വിധിക്കാനോ സാധിക്കും.
മറ്റ് ഭരണപരമായ നടപടികള്‍: ഡ്രൈവര്‍മാര്‍ക്കെതിരെ മറ്റ് ഭരണപരമായ (Administrative) നടപടികള്‍ സ്വീകരിക്കാനും കോടതികള്‍ക്ക് അധികാരമുണ്ടായിരിക്കും.
പിഴയടയ്ക്കാനുള്ള വഴികള്‍: സാഹെല്‍ (Sahel) ആപ്ലിക്കേഷന്‍ വഴിയോ മിനിസ്ട്രി ഓഫ് കമ്മ്യൂണിക്കേഷന്‍സിന്റെ വെബ്സൈറ്റ് വഴിയോ ട്രാഫിക് പിഴകള്‍ എളുപ്പത്തില്‍ അടച്ചുതീര്‍ക്കാവുന്നതാണെന്ന് മന്ത്രാലയം പൊതുജനങ്ങളെ ഓര്‍മ്മിപ്പിച്ചു.