കുവൈത്തില്‍ 80,800 താമസനിയമ ലംഘകര്‍;പരിശോധനകള്‍ തുടരും
കുവൈത്ത് സിറ്റി: കുവൈത്ത് ആഭ്യന്തര മന്ത്രാലയം രാജ്യത്തുടനീളം നടത്തുന്ന റെസിഡന്‍സി പരിശോധനകള്‍ ഫലം കാണുന്നതായി ഔദ്യോഗിക കണക്കുകള്‍. പുതിയ താമസ നിയമലംഘനങ്ങള്‍ റിപ്പോര്‍ട്ട് ചെയ്യപ്പെടുന്നുണ്ടെങ്കിലും, നിയമലംഘകരുടെ എണ്ണത്തില്‍ ഗണ്യമായ കുറവുണ്ടായതായി സെന്‍ട്രല്‍ സ്റ്റാറ്റിസ്റ്റിക്കല്‍ ബ്യൂറോ പുറത്തുവിട്ട പുതിയ റിപ്പോര്‍ട്ടില്‍ വ്യക്തമാക്കുന്നു.
2024-ന്റെ അവസാനത്തില്‍ 81,500 ആണ് നിയമലംഘകര്‍ എങ്കില്‍, 2025 അവസാനിച്ചപ്പോഴേക്കും 80,800 ആയി കുറഞ്ഞിട്ടുണ്ട്. നിലവിലുള്ള കേസുകള്‍ നിയമപരമായ നടപടികളിലൂടെ പരിഹരിക്കുന്നതും കര്‍ശനമായ സുരക്ഷാ പരിശോധനകളുമാണ് ഈ കുറവിന് കാരണം.
നിയമലംഘനങ്ങളില്‍ വര്‍ദ്ധനവ്
രാജ്യത്ത് നിലവിലുള്ള നിയമലംഘകരുടെ എണ്ണം കുറയുമ്പോഴും, 2025-ല്‍ പുതിയതായി താമസനിയമം ലംഘിച്ചവരുടെ എണ്ണത്തില്‍ വര്‍ദ്ധനവുണ്ടായിട്ടുണ്ട്. 2024-ല്‍ 10,700 പുതിയ നിയമലംഘനങ്ങള്‍ റിപ്പോര്‍ട്ട് ചെയ്ത സ്ഥാനത്ത്, 2025-ല്‍ 11,700 പുതിയ കേസുകള്‍ രേഖപ്പെടുത്തി.
ആര്‍ട്ടിക്കിള്‍ 18 (സ്വകാര്യ മേഖല): പുതിയ നിയമലംഘനങ്ങളില്‍ ഭൂരിഭാഗവും സ്വകാര്യ മേഖലയിലെ വര്‍ക്ക് പെര്‍മിറ്റുകളുമായി ബന്ധപ്പെട്ടതാണ് (4,300 കേസുകള്‍).
ആര്‍ട്ടിക്കിള്‍ 14 (താല്‍ക്കാലിക വിസ): താല്‍ക്കാലിക റെസിഡന്‍സി പെര്‍മിറ്റുകളുമായി ബന്ധപ്പെട്ട് 4,100 നിയമലംഘനങ്ങളും റിപ്പോര്‍ട്ട് ചെയ്തു.
ഗാര്‍ഹിക തൊഴിലാളികള്‍, കുടുംബ വിസ എന്നിവയിലെ നിയമലംഘനങ്ങള്‍ താരതമ്യേന കുറവാണ്.
സാധുവായ വിസകള്‍-31.66 ലക്ഷം
താമസ നിയമലംഘകര്‍ക്ക് എതിരെ കര്‍ശന നടപടി തുടരുമ്പോഴും രാജ്യത്തെ പ്രവാസി തൊഴിലാളികളുടെ എണ്ണത്തില്‍ വലിയ വര്‍ദ്ധനവ് രേഖപ്പെടുത്തിയിട്ടുണ്ട്. 2025 അവസാനത്തോടെ കുവൈത്തിലെ സാധുവായ റെസിഡന്‍സി പെര്‍മിറ്റുകളുടെ ആകെ എണ്ണം 3.166 മില്യണ്‍ ആയി ഉയര്‍ന്നു. മുന്‍ വര്‍ഷത്തെ അപേക്ഷിച്ച് 14.7 ശതമാനം വര്‍ദ്ധനവാണ് രേഖപ്പെടുത്തിയത്.
വിസ വിഭാഗം തിരിച്ചുള്ള കണക്കുകള്‍
ആര്‍ട്ടിക്കിള്‍ 18 (സ്വകാര്യ മേഖല): ആകെ പെര്‍മിറ്റുകളുടെ പകുതിയിലധികം വരുന്നത് ഈ വിഭാഗത്തിലാണ് (ഏകദേശം 1.66 മില്യണ്‍).
ആര്‍ട്ടിക്കിള്‍ 20 (ഗാര്‍ഹിക തൊഴിലാളികള്‍): 773,300 പെര്‍മിറ്റുകളുമായി രണ്ടാം സ്ഥാനത്ത്.
ആര്‍ട്ടിക്കിള്‍ 22 (ഫാമിലി ഡിപെന്‍ഡന്റ്): 566,600 പെര്‍മിറ്റുകളുമായി മൂന്നാം സ്ഥാനത്ത്.
റദ്ദാക്കുന്ന വിസകളുടെ എണ്ണത്തില്‍ കുറവ്
കഴിഞ്ഞ മൂന്ന് വര്‍ഷമായി തുടരുന്ന രീതി അനുസരിച്ച് റെസിഡന്‍സി പെര്‍മിറ്റുകള്‍ റദ്ദാക്കുന്നതില്‍ (Visa Cancellation) കുറവ് രേഖപ്പെടുത്തിയിട്ടുണ്ട്. 2024-ല്‍ 49,700 വിസകള്‍ റദ്ദാക്കിയപ്പോള്‍ 2025-ല്‍ അത് 47,200 ആയി കുറഞ്ഞു.
ദേശീയത അടിസ്ഥാനമാക്കിയുള്ള കണക്കുകള്‍ പ്രകാരം, കുവൈത്തിലെ വിസ ഉടമകളിലും താമസ നിയമലംഘകരിലും ഭൂരിഭാഗവും അറബ് ഇതര ഏഷ്യന്‍ രാജ്യങ്ങളില്‍ (ഇന്ത്യ ഉള്‍പ്പെടെയുള്ളവ) നിന്നുള്ളവരാണ്. കൂടാതെ കഴിഞ്ഞ നാല് വര്‍ഷമായി അറബ് ഇതര ആഫ്രിക്കന്‍ രാജ്യങ്ങളില്‍ നിന്നുള്ള താമസക്കാരുടെ എണ്ണത്തിലും വര്‍ദ്ധനവുണ്ട്.
പുതിയ നിയമലംഘനങ്ങള്‍ ഒരു വെല്ലുവിളിയായി തുടരുമ്പോഴും, വിട്ടുവീഴ്ചയില്ലാത്ത പരിശോധനകളിലൂടെയും കൃത്യമായ നിയമ നിര്‍വ്വഹണത്തിലൂടെയും കുവൈറ്റിലെ താമസ വിസ സംവിധാനം കൂടുതല്‍ സുതാര്യമാക്കാന്‍ അധികൃതര്‍ക്ക് സാധിക്കുന്നുണ്ടെന്ന് റിപ്പോര്‍ട്ട് വ്യക്തമാക്കുന്നു.